Gwlad yng nghanol Ewrop, a chanddi arfordir ar y Môr Baltig a Môr y Gogledd yw'r Almaen. Mae ganddi dir isel yn y gogledd, bryniau yn y canol a mynyddoedd yn y de. Mae ganddi boblogaeth o 83 miliwn o bobl, y fwyaf yn Ewrop, sy'n byw ar 39 miliwn o aelwydydd a dwysedd poblogaeth o 236 o drigolion am bob cilometr sgwâr. Mae lefel y trefoli yn gymharol uchel, sef 87.5%.

Y cynnyrch mewnwladol crynswth (CMC), sef $33,922, oedd y deunawfed uchaf yn y byd yn 2005 yn ôl y Gronfa Ariannol Ryngwladol. Mae hyn yn cymharu â Lwcsembwrg, ar $75,130, sydd â'r CMC uchaf yn y byd, a'r DU yn y trydydd safle ar ddeg, gyda $36,599[1]. Roedd CMC y pen yng Nghymru tua 79% o ffigur y DU, sy'n gyfystyr â rhyw $28,915[2].

Cafodd y sector telathrebu ei ryddfrydoli'n llwyr ym mis Ionawr 1998 ac mae'n cael ei reoleiddio gan y Bundesnetzagentur (BNetzA) neu'r Asiantaeth Rhwydweithiau Ffederalaidd, a oedd, cyn Awst 2005, yn cael ei hadnabod fel y Regulierrungsbehörde fur Telekommunikation und Post (RegTP).

Lansiodd y llywodraeth ei strategaeth ar gyfer cymdeithas wybodaeth, Cymdeithas Wybodaeth yr Almaen 2006, ym mis Rhagfyr 2003. Mae amcanion penodol y strategaeth ar gyfer y rhyngrwyd a band eang yn cynnwys:

 

Mae canfyddiadau allweddol astudiaeth Deutschland Online 3 yn awgrymu y bydd: "gwell seilwaith band eang yn holl-bwysig ar gyfer cystadleurwydd byd-eang yr Almaen" [4].

 

Ymhellach, er mwyn rhoi hwb i ddefnyddio band eang ymhlith mentrau bach a chanolig (MBCh), mae'r llywodraeth wedi cynnal ymgyrch hysbysrwydd, wedi cynnig gwasanaethau ymgynghori di-dâl ar ddefnyddio band eang ac wedi creu gwobrau am brojectau band eang arloesol.

O ran preifateiddio'r farchnad delathrebu, cafod y gweithredwr gwreiddiol, Deutsche Telekom, ei breifateiddio gan y llywodraeth ym 1996. Mae Gweriniaeth Ffederalaidd yr Almaen wedi cadw cyfran o 15% yn y gweithredwr gwreiddiol ac mae tua 22% yn perthyn i fanc y wladwriaeth, KfW. Roedd y Weriniaeth Ffederalaidd wedi cyhoeddi o'r blaen y byddai'n gwerthu ei chyfrannau erbyn 2006 ond hyd yn hyn does dim tystiolaeth i awgrymu bod hynny wedi digwydd[6].

O ran y lled band rhyngwladol, yr Almaen oedd â'r nawfed lefel uchaf am bob trigolyn yn y byd yn 2004, yn ôl yr Undeb Telathrebu Rhyngwladol (ITU), gyda mwy na 6.9Mbps y person. Denmarc oedd â'r lefel uchaf, sef tua 35Mbps y person ac roedd y DU yn bedwerydd uchaf, gyda lled band o ryw 13Mbps y person[7].

O safbwynt rhwystrau cymdeithasol ac economaidd sy'n atal twf band eang, mae gan yr Almaen hanes o ddiweithdra uchel a galw domestig gwan. Mae'r rhwystr sy'n dod yn sgil diweithdra uchel yn arbennig o amlwg o gymharu'r Almaen â'r economïau mawr eraill. Yn ôl yr OECD, roedd y gyfradd ddiweithdra safonedig yn 9.5% ym mis Rhagfyr 2005, sef bron unwaith a hanner cyfartaledd yr OECD o 6.4%, a'r uchaf ymhlith grŵp gwledydd yr G7[8]. Mae hyn yn rhwystro TGCh sylfaenol a band eang rhag treiddio'n ehangach.

Yn nhermau'r sbardunau cymdeithasol, mae 92% o'r arbenigwyr o asiantaethau'r llywodraeth a holwyd yn astudiaeth Deutschland Online 3 yn credu bod gan bobl sydd ar-lein fantais bendant yn eu bywydau cymdeithasol a phroffesiynol dros y rhai nad ydyn nhw ar-lein[9].

Mae marchnad band eang yr Almaen yn wahanol i farchnadoedd eraill Ewrop, a hynny am fod Deutsche Telekom wedi rhedeg DSL dros safon ISDN (Rhwydwaith Digidol Gwasanaethau Integredig) er mwyn diogelu eu busnes ISDN mawr a llwyddiannus. Oherwydd hyn, roedd rhaid cael ISDN ar gyfer cysylltiadau ADSL. Er hynny, mae'r bwndelu yma wedi dod i ben wedyn ac mae nifer y llinellau ISDN wedi dechrau gostwng.

O ran maint y farchnad, ar ddiwedd mis Rhagfyr 2005, cyfrifwyd bod tua 10.7 miliwn o linellau band eang. Mae hynny'n dwf o ryw 3.8 miliwn o gysylltiadau, neu 55.1%, yn ystod 2005[12].

Mae twf y farchnad yn cymharu'n ffafriol â'r twf o 33% a gofnodwyd ar draws yr OECD[13] a'r twf o 37% ledled y byd[14] ar gyfer yr un cyfnod; mae'n awgrymu bod gan farchnad band eang yr Almaen beth ffordd i fynd eto cyn cyrraedd ei llawn dwf.

 

 

MaeAnalysys Research yn darogan y bydd rhyw 14.4 miliwn o gysylltiadau band eang erbyn diwedd 2006. Byddai hynny'n gyfystyr â chyfradd dreiddio o rwy 17.3 o gysylltiadau am bob 100 o drigolion yn y boblogaeth.

Yn ôl ffigurau'r OECD, mae'r Almaen yn y deunawfed safle yn yr OECD yn nhermau treiddiad band eang am bob pen o'r boblogaeth; gyda 13.0% yn hawlio gwasanaeth ym mis Rhagfyr 2005. Mae'r ffigur yma'n gosod yr Almaen ychydig y tu ôl i'r OECD yn ei grynswth, lle'r oedd y treiddiad cyfartalog wedi cyrraedd 13.6% o'r boblogaeth. Gwlad yr Iâ, lle mae band eang wedi treiddio i 26.7% o'r boblogaeth, oedd â'r treiddiad uchaf yn y byd, ar y blaen i Gorea (25.4%) a'r Iseldiroedd (25.3%). Roedd y DU yn drydydd ar deg, gyda 15.9 o gysylltiadau am bob 100 o drigolion, a Groeg oedd â'r treiddiad band eang isaf yn yr OECD, gydag 1.4 o gysylltiadau band eang am bob 100 o drigolion[15].

O ran treiddiad band eang fesul aelwyd, roedd gan ryw 27% o'r aelwydydd gysylltiad band eang ym mis Rhagfyr 2005[16]; mae hynny'n gosod yr Almaen y tu allan i'r deg gwlad uchaf yn y byd. Mae hyn yn llawer is na threiddiad aelwydydd Corea, yr uchaf yn y byd, a oedd tua 78.5% o'r aelwydydd bryd hynny. Ym Monaco yr oedd y lefelau treiddiad uchaf yn Ewrop, sef 69% o'r holl aelwydydd, ac roedd yr Iseldiroedd a Denmarc yn sgorio'n uchel hefyd, gyda 58% a 54% yn y drefn honno. Mae treiddiad band eang fesul aelwyd yn y DU hefyd ar y blaen i'r Almaen, gan fod cysylltiad band eang gan ryw 38% o holl aelwydydd y DU[17].

Mae BITKOM, Cymdeithas Technoleg Gwybodaeth, Telathrebu a Chyfryngau Newydd yr Almaen, yn darogan y bydd treiddiad band eang ymhlith aelwydydd yn codi i 34% yn 2007[18].

Mae llywodraeth yr Almaen yn awyddus i roi hwb i ddefnyddio TGCh a band eang ymhlith busnesau a, fel rhan o strategaeth Cymdeithas Wybodaeth yr Almaen 2006, mae wedi pennu amcan o gynyddu'r defnydd helaeth ar e-Fusnes i 40% o'r MBCh erbyn 2008.

 

O ran seilwaith band eang, mae ffigurau gan Ovum yn dangos y gallai 91% o boblogaeth yr Almaen gyrchu gwasanaeth band eang ym mis Medi 2005[20]. Mae hyn yn dangos mai ychydig o dwf sydd wedi bod yn y cyflenwad yn ddiweddar, gan fod band eang ar gael i ryw 90% o'r boblogaeth mor gynnar â 2003. Er gwaethaf hyn, mae'r Llywodraeth ffederalaidd wedi dweud ei bod yn credu bod cyflenwad band eang ar gael yn helaeth ac felly nad yw'n rhag-weld y bydd yn defnyddio arian cyhoeddus er mwyn cynyddu'r cyflenwad.

 

 

 

Ar ôl mwynhau lled-fonopoli dros eu llinellau eu hunain am beth amser, daeth cystadleuaeth i Deutsche Telekom i'r amlwg ym mis Ebrill 2004 pan gafodd cynnyrch cyfanwerthol ei orfodi arnyn nhw, gan ganiatáu i ISPs manwerthol ailwerthu llinellau'r gweithredwr gwreiddiol. Er gwaethaf llwyddiant diweddar ailwerthu, does dim cynlluniau i gyflwyno cynnyrch didlif yn y farchnad ac mae ansicrwydd ynghylch rheoleiddio'r farchnad gyfanwerthol yn golygu nad yw'n debyg y bydd cynnyrch didlif yn cael ei lansio yn y dyfodol agos[23].

 

O ran y cyflenwad DSL, gall mwy na 90% o'r aelwydydd gyrchu gwasanaethau band eang drwy gyfrwng DSL. Mae'r amodau ar gyfer DSL yn arbennig o ffafriol yn yr Almaen am fod y dolenni lleol yn mesur 1.5-2km ar gyfartaledd. Ar y llaw arall, dim ond 17% o aelwydydd y DU a 19% o aelwydydd Cymru sydd â dolen leol sy'n mesur 2km neu lai. Ar ben hynny, mae rhyw 95-98% o'r holl linellau yn gydnaws â DSL[24].

Mae Deutsche Telekom wedi bod yn treialu ADSL2+ a VDSL2yn ystod 2005. Disgwylir gweld gwasanaethau ADSL2+ yn cael eu lansio ym mis Mai 2006. Ymhellach, mae'r gweithredwr gwreiddiol yn ymrwymo EUR3 biliwn ar gyfer adeiladau FTTN (Ffibre-at-y-Nod) yn hanner cant o ddinasoedd mwyaf yr Almaen, sy'n golygu y bydd rhaid i Deutsche Telekom gwtogi'r dolenni lleol a gosod DSLAMs yn agosach at y defnyddwyr. Mae Deutsche Telekom yn credu y bydd yn cysylltu tua 2.9 miliwn o aelwydydd â'r rhwydwaith newydd erbyn canol 2006, ac y bydd hanner cant o ddinasoedd wedi'u cysylltu ac yn rhedeg gwasanaethau VDSL2 50Mbps yn 2007[25]. Mae rhoi'r rhwydwaith VDSL newydd ar waith wedi creu rhai problemau rheoleiddio; dadl y gweithredwr gwreiddiol yw y dylai'r rhwydwaith newydd fod yn esempt rhag y rheoleiddio presennol, gan fod y gwasanaethau y bydd yn eu darparu yn gyfystyr â marchnad newydd.

Mae'r posibilrwydd y bydd y gweithredwr gwreiddiol yn cynnig gwasanaethau VDSL heb orfod cynnig cynnyrch cyfanwerthol i weithredwyr eraill wedi peri i rai o'r cystadleuwyr gynnig cyfrannu at gost y seilwaith newydd yn dâl am gael cynnig eu gwasanaethau VDSL eu hunain dros y rhwydwaith newydd. Er hynny, mae'r Comisiwn Ewropeaidd wedi dadlau nad oes sail dros honni bod yna farchnad ar wahân ar gyfer VDSL a bod ADSL2+ yn caniatáu gwasanaethau tebyg, sy'n golygu ei bod yn debyg y bydd rhaid i Deutsche Telekom ddarparu cynnyrch cyfanwerthol ar gyfer eu cystadleuwyr.

Dadfwndelu dolenni lleol (LLU), sydd ar gael ers 1998, yw'r prif fath o gystadleuaeth sy'n wynebu'r gweithredwr gwreiddiol. Er hynny, mae'r cystadleuwyr wedi hoelio sylw ar y farchnad busnes, heb wneud fawr o argraff ar y farchnad breswyl. Mae hyn yn arwain at brisiau cymharol uchel o farchnad mor fawr.

 

Cafwyd gostyngiad ym mis Mehefin 2004 yng nghost dolenni lleol, a hynny ar ôl i'r Comisiwn Ewropeaid ymyrryd er mwyn cynyddu'r cystadlu. Roedd y gostyngiad yn y pris wedi cymryd pedair blynedd i ddod i'r amlwg ers i Deutsche Telekom gael eu cyfarwyddo i ostwng prisiau a dim ond o drwch blewyn y llwyddwyd i osgoi achos ffurfiol. Gwelwyd rhagor o ostyngiadau ym mhrisiau dadfwndelu llawn ym mis Ebrill 2005, gan roi hwb i'r farchnad LLU breswyl.

Ers i'r rheoleiddiwr weithredu ynglŷn ag LLU yn 2002, mae'r nifer cynyddol o weithredwyr wedi peri cynnydd yn y cystadlu a gostyngiad o dipyn i beth yng nghyfran Deutsche Telekom o'r farchnad.

Mae Arcor, yr ail fwyaf o'r gweithredwyr ym maes llinellau gosod, sydd â miliwn a rhagor o gysylltiadau ar hyd llinellau DSL wedi'u dadfwndelu, yn cynnig band eang wedi'i ddadfwndelu mewn 300 o ddinasoedd ac erbyn diwedd 2006 maen nhw'n bwriadu ymestyn i 45% o'r boblogaeth[27]. Yn y cyfamser, mae QSC wedi dadfwndelu cyfnewidfeydd mewn 110 o ddinasoedd ac maen nhw'n parhau i ymestyn, er eu bod yn canolbwyntio ar y farchnad fusnes yn bennaf ar ôl lleihau eu presenoldeb yn y farchnad breswyl.

Ymhellach, mae Tiscali wedi dechrau dadfwndelu yn ardal Frankfurt ac maen nhw'n bwriadu buddsoddi EUR60-70 miliwn mewn LLU er mwyn cyrraedd 50% o'r holl aelwydydd erbyn 2008. Yn y cyfamser, mae Telefónica Deutschland wedi cyhoeddi eu bod yn bwriadu ymestyn eu cylch nhw i 40% o'r holl aelwydydd ac maen nhw'n cyfanwerthu eu gwasanaethau DSL i ISPs eraill ac mae BT Germany hefyd wedi lansio gwasanaethau cyfanwerthu DSL[28].

O ran gwasanaethau sydd â lled band uwch, mae United Internet, Versatel, Arcor, QSC a Telefónica Deutschland i gyd wedi lansio, neu wedi cyhoeddi eu bod yn bwriadu lansio, gwasanaethau ADSL2+ cyflym yn yr ardaloedd y maen nhw wedi'u dadfwndelu.

Un her i Deutsche Telekom yw mor anodd yw hi i'r gweithredwr gwreiddiol ddiffinio cyfraddau cenedlaethol cystadleuol, gan eu bod yn cystadlu yn erbyn gweithredwyr gwahanol mewn ardaloedd gwahanol, megis HanseNet, sydd â chyfran o fwy na 50% o'r farchnad yn eu tref eu hunain, sef Hamburg. Ym mis Mehefin 2005, gostyngodd uned T-Online Deutsche Telekom y gyfradd fisol am eu pecyn DSL gorau ei werthiant 50% mewn ymateb i'r toriadau yma ym mhrisiau'r cystadleuwyr.

Mae rhwydwaith cebl yn mynd heibio i ryw 31 miliwn o aelwydydd (80% o'r holl aelwydydd) ac mae gan 22 miliwn gysylltiad. Er hynny, mae'r rhan fwyaf o'r rhwydweithiau yma heb eu huwchraddio ar gyfer band eang cebl ac ar ddiwedd 2005 dim ond 6 miliwn o aelwydydd (15% o'r holl aelwydydd) a allai gael gwasanaethau band eang dros rwydwaith cebl[29].

Un flaenoriaeth i'r farchnad band eang yw ysgogi gwaith i uwchraddio rhwydweithiau cebl ar gyfer band eang drwy ailstrwythuro'r gweithredwyr cebl. Roedd y rhan fwyaf o'r rhwydweithiau cebl yn arfer perthyn i DT nad oedden nhw'n cynnig band eang cebl ond yn hoelio sylw yn hytrach ar DSL ac felly doedd y rhwydweithiau cebl ddim yn cael eu huwchraddio. Cymhleth iawn yw strwythur perchnogaeth y rhwydweithiau ceblau ar hyn o bryd, a hynny oherwydd ymyrraeth annoeth gan y wladwriaeth[30].

Amcangyfrifwyd y byddai uwchraddio'r rhwydweithiau cebl er mwyn darparu gwasanaethau band eang dau-gyfeiriad yn golygu buddsoddi tua EUR9 biliwn. Er hynny, fe fyddai ailstrwythuro a chydgrynhoi perchnogaeth y rhwydwaith cebl yn cynyddu gwerth gwaith uwchraddio ar raddfa fawr yn y dyfodol.

 

Mae yna arwyddion bod rhagor o rwydweithiau cebl yn dechrau cael eu huwchraddio: mae Kabel Deutschland, y gweithredwr cebl mwyaf, yn bwriadu uwchraddio 90% o'u rhwydwaith nhw ar gyfer gwasanaethau band eang erbyn diwedd 2008.

 

Cafodd trwyddedau Mynediad Diwifr Sefydlog (FWA) eu dyfarnu i 12 o weithredwyr ym 1999, ond, fel yn y rhan fwyaf o'r gwledydd eraill, mae wedi bod yn anodd denu cwsmeriaid a hynny am fod DSL ar gael yn eang ac mae'r rhan fwyaf o'r gweithredwyr yma wedi mynd i'r wal.

Lansiodd Deutsche Telekom dreial WiMAX ym mis Gorffennaf 2005 gan fwriadu dod â gwasanaethau band eang i ardaloedd gwledig. Mae Arcor hefyd wedi lansio gwasanaeth WiMAX ym Merlin, Dusseldorf a Kaiserslautern.

O ran 'mannau poeth' ar gyfer mynediad cyhoeddus, roedd tua 25 o ddarparwyr yn gweithredu mwy na 6,000 o 'fannau poeth' diwifr erbyn diwedd 2005.

Mae ambell rwydwaith ffibr bach o amgylch y wlad. Mae un project o'r fath ar waith yn Schwerte, Nordrhein-Westfalen ac yn cael ei redeg gan Stadtwerke Schwerte Ruhrpower, y mae 47% ohono'n perthyn i gyngor Shwerte, 23.5% i ddinas Dortmund a 23.5% i grŵp RWE Energy.

 

Ar ben hynny, mae'r gweithredwr lleol NetCologne wedi cyhoeddi y byddan nhw'n buddsoddi EUR200 miliwn mewn ffibr er mwyn dod â gwasanaethau FTTH i ddinas Cwlen.

 

Mae Analysys Research yn amcangyfrif bod tua 9,500 o gysylltiadau band eang ffibr ar ddiwedd 2005.

Mae Analysys Research yn amcangyfrif bod rhyw 28,000 o gysylltiadau band eang lloeren ar ddiwedd 2005. Mae hyn yn ostyngiad o ryw 13,000 o gysylltiadau ers diwedd 2004.

 

Yr Almaen yw un o'r ychydig farchnadoedd yn Ewrop lle mae gwasanaethau band eang dros linellau pŵer ar gael yn fasnachol. Er hynny, cyfyngedig yw nifer y tanysgrifwyr a does dim disgwyl y bydd y dechnoleg yn creu fawr o effaith ar y farchnad ehangach. Amcangyfrif Analysys Research oedd bod tua 9,700 o gysylltiadau band eang dros linellau pŵer ar ddiwedd 2005.

 

Yn ôl Deutsche Telekom, roedd dros 60 o gwmnïau yn cynnig llinellau DSL yn 2005, naill ai drwy eu hailwerthu neu dros eu seilwaith eu hunain. Ar ben hynny, mae bron 40 o weithredwyr yn cynnig gwasanaethau band eang cyflym dros rwydweithiau cebl[31].

Yn hanesyddol, mae Deutsche Telekom wedi tra-arglwyddiaethu ar y farchnad DSL fanwerthol. Er hynny, yn sgil cyflwyno ailwerthu ym mis Ebrill 2004 a buddsoddiadau cynyddol mewn LLU, mae eu cyfran nhw o'r farchnad yn dechrau gostwng.

Yn ôl Analysys Research, tanysgrifiadau manwerthu Deutsche Telekom oedd 47% o gyfanswm y cysylltiadau yn y farchnad band eang ar ddiwedd 2005. Mae hynny'n gyfystyr â chyfran fanwerthol o 49% o'r farchnad DSL.

Mae'r defnyddio ar wasanaethau band eang mwy soffistigedig, megis IPTV, VoD, etc, yn cynyddu. Ar gyfer y gwasanaethau soffistigedig yma, mae angen mwy o led band yn gyffredinol na'r hyn y mae ei angen ar gyfer cymwysiadau band eang traddodiadol ac felly mae lled band y cysylltiadau yn cynyddu ar gyfartaledd. Mae arbenigwyr band eang yn darogan y bydd y cyflymder cysylltu cyfartalog yn cynyddu o 1Mbps yn 2004 i fwy na 30 Mbps yn 2015. Y prif gymwysiadau y disgwylir iddyn nhw hybu'r cynnydd yn lled y band yw VoIP, VoD a gwasanaethau triphlyg wedi'u cyfuno[32].

 

Tuedd ddiweddar yn y farchnad yw cyflwyno bwndeli sy'n cynnwys llinell sefydlog a ffôn symudol. Mae'r gweithredwyr QSC a BT Global Services wedi lansio pecynnau sy'n cynnwys y ddau hyn i'r sector busnes a'r disgwyl yw y bydd gwasanaethau preswyl ar gael yn 2006. I fynd i'r afael â'r bygythiad yma, mae Deutsche Telekom wedi lansio gwasanaeth a all gael ei ddefnyddio dros ffôn ar linell sefydlog a rhwydwaith symudol. Mae dau ddewis ar gael gyda'r gwasanaeth yma; defnyddio PSTN safonol ar gyfer y galwadau ar y llinell sefydlog neu ddefnyddio VoIP drwy gysylltiad WLAN.

 

Lansiodd Deutsche Telekom wasanaeth VoD ar ddiwedd 2003 a chynnig ffilmiau am EUR3-4 yr un. Cafodd tua 100,000 o ffilmiau eu lawrlwytho yn ystod mis Rhagfyr 2005. Mae Deutsche Telekom hefyd yn cynnig gwasanaeth lawrlwytho cerddoriaeth a gwasanaeth chwarae gemau ar-lein.

 

Mae canfyddiadau astudiaeth Deutschland Online 3 yn awgrymu y bydd canran yr aelwydydd sy'n defnyddio VoD yn cyrraedd 23% yn 2015.

 

Mae Deutsche Telekom yn bwriadu lansio gwasanaeth IPTV yn ail hanner 2006. Bwriedir cynnig 100 o sianeli am ddim a sianeli teledu am dâl hefyd, gan gynnwys pêl-droed byw ar HDTV.

Mae'r Almaen yn llawer mwy datblygedig o ran defnyddio VoIP na llawer o wledydd gorllewin Ewrop. Roedd tua 50 o gwmnïau yn cynnig gwasanaethau VoIP i'r farchnad dorfol ar ddiwedd 2005.

Lansiodd AOL wasanaeth VoIP yn Ebrill 2005 gan gynnig galwadau cenedlaethol heb gyfyngiad am EUR8.99 y mis. Ar ben hynny, lansiodd Arcor wasanaeth VoIP yn Ebrill 2005 gan gynnig ffôn dros fideo a galwadau drwy fannau poeth WiFi, ac mae United Internet a freenet.de yn cynnig gwasanaethau VoIP ers 2004[33]. Mae sawl gweithredwr cebl wedi lansio gwasanaethau VoIP hefyd.

Mae canfyddiadau astudiaeth Deutschland Online 3 yn awgrymu y bydd canran yr aelwydydd sy'n defnyddio'u cysylltiad band eang ar gyfer teleffoni yn codi o 1% yn 2004 i 35% yn 2015.

Mae Deutsche Telekom yn chwilio am dwf ym maes chwarae triphlyg ac maen nhw wedi targedu miliwn o gwsmeriaid chwarae triphlyg erbyn diwedd 2007. Gallai cystadleuaeth ddod o du'r gweithredwr cebl Kabel Deutschland: maen nhw'n bwriadu uwchraddio 90% o'u rhwydwaith nhw ar gyfer gwasanaethau chwarae triphlyg erbyn diwedd 2008.

 

Mae canfyddiadau astudiaeth Deutschland Online 3 yn awgrymu y bydd canran yr aelwydydd sy'n tanysgrifio i becyn chwarae triphlyg yn codi o 4% yn 2005 i 32% yn 2015.

O gofio maint y farchnad, nid yw marchnad band eang yr Almaen wedi'i datblygu'n dda iawn o'i chymharu â marchnadoedd band eang eraill gorllewin Ewrop. Mae hyn yn deillio yn bennaf o safle dominyddol y gweithredwr gwreiddiol a fu'n hwyr iawn yn caniatáu cystadleuaeth drwy ailwerthu eu cynhyrchion cyfanwerthol.

Mae lefelau treiddiad band eang yn debyg i'r cyfartaledd Ewropeaidd, sef 13 o gysylltiadau band eang am bob 100 o drigolion ar ddiwedd 2005. Mae hyn yn bell o gyrraedd lefelau treiddiad y rhyngrwyd yn y prif genhedloedd fel Corea a'r Iseldiroedd, sef mwy na 25 o gysylltiadau am bob 100 o drigolion, sy'n dangos bod digon o le ar gyfer rhagor o dwf yn y farchnad band eang. Ymhellach, mae'r ffigurau ar gyfer treiddiad ymhlith aelwydydd, sef 27 o gysylltiadau band eang am bob 100 o aelwydydd gryn dipyn y tu ôl i lefelau dwysedd y ffôn; amcangyfrif Analysys Research yw bod yna 89 o linellau ffôn sefydlog am bob 100 o aelwydydd. Mae'r ffigurau yma, a'r ffaith bod twrf band eang yn dal yn gryf, yn awgrymu nad yw'r farchnad yn debyg o fod yn gyflawn am beth amser.

Er mwyn i'r farchnad symud yn ei blaen, mae angen i gystadleuaeth o du technolegau eraill symbylu'r farchnad. Byddai buddsoddiadau yn y rhwydwaith cebl yn cynyddu'r gystadleuaeth a hefyd yn sicrhau bod y rhwydweithiau'n gynaliadwy gan y bydd yna alw am led band uwch yn y dyfodol.Mae gweithredwyr cebl yn cydgrynhoi ac yn cytuno ar gytundebau ailwerthu, gan greu'r amgylchedd sy'n angenrheidiol i fuddsoddi ar raddfa fawr yn y rhwydweithiau y mae eu hangen er mwyn uwchraddio gwasanaethau band eang.

---

[1] At ddibenion yr adran yma, bernir mai gwasanaethau preswyl sydd â chyflymder i lawr o fwy na 2Mbps, ac sy'n defnyddio technolegau ADSL neu gebl yw gwasanaethau'r 'ail genhedlaeth'

---

[1] Y Gronfa Ariannol Ryngwladol, World Economic Outlook Database, Ebrill 2006

[2] Western Mail, Building better future? Not quite, 15 Mehefin 2005

[3] Gwefan Interentworldstats.com. Ar gael yn www.internetworldstats.com/eu/de.htm

[4] Deutschland Online, Deutschland Online 3, Mehefin 2006

[5] Gwefan Menter D21. Ar gael yn www.initiatived21.de/english/lighthouse/broadband.php

[6] Analysys Research, Country Report: Germany, Mawrth 2006

[7] Yr Undeb Telathrebu Rhyngwladol, World Telecommunications Indicators, Rhagfyr 2005

[8]Datganiad i'r wasg gan yr OECD, OECD Standardised Unemployment Rate falls to 6.4% in Rhagfyr 2005, 10 Chwefror 2006

[9] Deutschland Online, Deutschland Online 3, Mehefin 2006

[10] Analysys Research, Country Report: Germany, Mawrth 2006

[11] OECD, Cronfa ddata ICT ac Eurostat, Community Survey on ICT usage in households and by individuals, Mai 2005

[12] Analysys Research, Penetration of broadband technologies, Mai 2006

[13] OECD, OECD Broadband Statistics, Rhagfyr 2005, Ebrill 2006

[14] Point Topic, World Broadband Statistics:Q4 2005, Mawrth 2006

[15] OECD, OECD Broadband Statistics, Rhagfyr 2005, Ebrill 2006

[16] Yr Asiantaeth Rhwydweithiau Ffederalaidd, Annual Report 2005, Chwefror 2006

[17] Point Topic, World Broadband Statistics:Q4 2005, Mawrth 2006

[18] BREAD, Second report on the multi-technological analysis of the 'broadband for all' concept, focus on the listing of multitechnological key issues and practical roadmaps on how to tackle these issues, Awst 2005

[19] OECD, Cronfa ddata ICT ac Eurostat, Community Survey on ICT usage in enterprises, Mai 2005

[20] Ovum, International Broadband Market Comparisons, Ionawr 2006

[21] EuroISPA, Cylchlythyr, Mai-Mehefin 2005

[22] Analysys Research, Penetration of broadband technologies, Mawrth 2006

[23] Analysys Research, Country Report: Germany, Mawrth 2006

[24] Ovum a Beacon, The BEACON Broadband Knowledge Base Report, Medi 2005

[25] Ovum, Deutsche Telekom opts for VDSL2, 2006

[26] ECTA, Broadband Scorecard Q4 2005, Mai 2006

[27] Wireless Watch, Awst 2006

[28] Analysys Research, Country Report: Germany, Mawrth 2006

[29] Yr Asiantaeth Rhwydweithiau Ffederalaidd, Annual Report 2005, Chwefror 2006

[30] Ovum a Beacon, The BEACON Broadband Knowledge Base Report, Medi 2005

[31] Yr Asiantaeth Rhwydweithiau Ffederalaidd, Annual Report 2005, Chwefror 2006

[32] Deutschland Online, Deutschland Online 3, Mehefin 2006

[33] Analysys Research, Country Report: Germany, Mawrth 2006

[34] Analysys Research, Broadband Pricing Study, Rhagfyr 2005